قصيدة (الولد) شعر :حاتم حواس

مدخل :

فارد إيديا للسما
موال غنا
وعيون بترمى المسا
نور يكتبك
تراتيل
والمس ترابك أسمعك
ساكنة الفرح
عصفورة من كتر الولع
ساكن جواكى الشجر
وفاتحة بابك للفضا
عشك وريد
جوّة قلوب العشقانين.

1

الولد السكران
النايم فى الزحمة
ومش عارف يرسم
صورة وطنه
ع الطاولة
وبيفتح باب
لكلام يتسرسب
من حلمه
ومقسوم نصّين
بيفكّر إنه
يرجع للصبح
ويرسم أرضية ياسمين
ويرش عليها
أغنيه كان ممكن ينساها
لو كمل نوم

2

الولد
النايم ع الطاوله
يعزف بعيون
نشيد وطنه
وبيحلم
بتراب الأرض
المسكونة بروح الرب .

3
الولد
الساكن فى هدوئه
وبيلعب فى صوابع وطنه
من كتر الخوف
ملفوف ف عبايةأغانيه
وبيحفظ ف نشيده الوطني
ومش شايف
غير ضحكة نجم بيرمي
على شط نخيله
غنوة مكسورة
من الغربة

4

الولد
اللي بيعزف ع الناي
ويفرّق جسده
على أحلام الساكنين جوّاه
مش عارف إنه
الولد المنسي
فى حلم الأم
ولا قادر يحكم رجليه
الملفوفة
فى شارع أحلامه
وبيمسك قلمه المكسور
مش عارف يكتب
اغنية عشقه!

5

الولد
الى بيسكر من تعبه
وبيفتح قلب سكوته
ويتكلم!
ويقرر بعد الكاس الألف سجوده
ويلملم كل كلامه ويرميه
هيفتّح باب للصبح
ويكتب إسمه عليه
ويلون وشّه
بلون الوطن الضاحك
ف إيديه.

6

الولد
المجنون بكلامه
وبيقرا تاريخ الوطن العاري
ف بسمة غيب
ويخطّط
للغيب الرحلة النايمة ف سفره
مش عارف يتعلم آهة
ولا قادر يمحي خطوط الكفّ
ولا قادر يستأذن
نفسه ف رحلة
مجهولة
لعيون البنت الغايبة
عن حلمه سنين
وبستناها
تصحى من النوم
ويحملها غناه
ويرقّصها
ويرسم فوق شطّ النيل
النخل العطشان
للتمر!

7

الولد
التعبان هينام
ف سكاته
وهيتعلّم يحلم برجوعه
ويفضفض
ويبارك كل آياته
ويلمّ عيونه من التوهان
ويفصّلهم للبنت جديلة
ويكمّل حلمها بالشعر
ويفتّح ألوان اللوحة
ويزينها بدمّه
ويلمها م الناس
ف السوق!

شعر حاتم حواس

 

 

Related Posts via Categories